mausi

Okay, sorry ich weiss ich ha scho lang nuem gschribe, abr die letschte zwoi Wuche sind eifach mega vil los gsi, und wenni mol Zyt gha ha hani nit unbedingt Luscht gha zum an PC z sitze und ebis z schribe… abr jetzt hanis jo endlich gschafft ;)

Am 23. Oktober bini mit minere Gastmuettr und em Gastvatr in dr Uni vo Augusta go „Sophie Scholl – die letzten Tage“ (- „the final days“) go luege. Sisch uf Duetsch gsi mit Englischem Untertitel was natuerlich sehr praktisch fuer mich gsi isch ;) Isch abr wuerkli no guet gmacht dr Film, halt eifach mega truurig!

Am Tag druuf, am DI, bini nach dr Schuel statt ins Schwuemmtraining zu somene Health check im Gym (Turnhalle) gange. Meh muess sone Health check (Bluetdruck messe, Auge check, schnuffe etc.) 1x im Johr mache damit me do andr Schuel cha Sport tribe – isch halt eifach sone Absicherig fuer die – und s chunnt billiger (nur $10.-) wemes a dere Verastaltig in dr Schuel macht als weme extra zumene Arzt goht.

Am DO bini denn Zobe mit minere Sis zu mim erschte JV (Junior Varsity) Football game gange.
Bim Sport gits (ussr bim schwuemme) imr no zwoi Gruppene – d Juniore (9. und 10. Klaessler) und d Seniore (11. und 12. Klaessler). Bi de Footballmatch goend die meischte eigentlich bi de Seniore go luege well dass denn halt „groessr“ isch (und chunnt denn au imr im Fernseh e Zemmefassig), abr ich ha halt au mol es JV Game wele gseh und denn simr denn Zobe nach X gange – allerdings nur ebe 1 Stund – isch trotzdem no cool gsi, au wenn halt nit so vil Luet doert gsi sind wells halt kei Home Game gsi isch… abr d Gegend ums Stadium ume het mega ans Quidditch Stadium + Umgebig vo Hogwarts (Harry Potter) erinneret (mit so Huegel im Hintergrund und so…) ;)

Am SA druf, dr 28. Oktober sind denn d Martine, d Sherley und ich an Augusta Canal (isch gram am Savannah River a) gange, well d Martine doert miteme Schuelkolleg es Bio projekt het miese mache. S hend denn doert au grad no es Baechli (Reed Creek) gha.
Isch no schoeni Gegend gsi, s het doert sogar es Mini mini Muesum uebere Kanal und d Gschicht gha (also eifach es Huus mit Sache drinn), abr sisch halt recht chalt gsi und mir sind um die 4 Stund doert gsi well si so lang brucht hend… Nochher sind mer denn chli zu de Laede gange und denn hanimer endlich mol es paar Kleidr choenne chaufe ;)

Am SO am Morge sind mer denn widr in d „soup kitchen“ go helfe vom 8.00 a.m. bis ebe 12.45 p.m.
Isch cool gsi wies letschte mol au scho, und dank dr Zytumstellig hemer denn au nit ganz eso frieh miese ufstoh ;)

Am MO sind denn d Schwuem try-outs gsi, und YESSSSS, I MADE IT! Ich has doch tatsaechlich ins Team gschafft *freu* =) 400 m am Stueck schwuemme ohni Halt… toent jetzt eigentlich wiene Witz weme bedenkt dass mer jetzt eigentlich pro Tag (1 Stund schwuemme) um die 1500 m schwuemme ;)
Abr sisch imr no hammer und macht mega Spass =) Und noegscht SA (18. November) isch denn scho s erschte „Meet“ (Wettkampf) :)

Am 31. Oktober isch jo Halloween gsi, und wie die meischte vo euch vermuetli wuesse goend in dr USA d Kinder go „trick or treaty“ praktiziere.
„Trick or treaty“ kenne mir als „Siessigkeite odr Streich“, allerdings mache mir dass – zumindest wo ich wohn – nit.
D Kinder und z.T. au Teenager verkleide sich am Obe, und sobalds Dunkel wird goend si vo Huus zu Huus, und wenns im Huus liecht het und es gschmueckt isch, goend si go luete und sege „trick or treaty“, und denn hebe si es Saeckli ahne und d Huusbewohner gebene Candies (vo Kitkat zu M&ms bis zu Lollipops).
Normalerwis goend do die Jugendliche i mim Alter nueme, abr wells jo mis erschte „richtige“ Halloween gsi isch hend mini Schweschtr und ich beschlosse z go (ich glaub si wird no go wenn si 20i isch ;)). Also sind mer denn am DI Obe verkleidet – si als „Banana in pyjamas“ (e Kinder TV Show), und ich als Hex – vo Huus zu Huus zoge und hend Siessigkeite gsammlet. Vor em Huus hemer denn no es paar Schuelkollege atroffe und denn no e chlini Fotosession gmacht ;)
Jo, uf jede Fall is mega fun gsi und mir hend vili vili Siessigkeite gsammlet =) Mini Sis het zwar gseit dass d Huesser in Pittsburgh (wo sie urspruenglich her chunnt) laenger Liecht hend und dassi vil meh Candies becho het, abr fuer eber wo normalerwis um die Zyt nie Siessigkeite bechunnt is a whole lot gsi =) Und ich ha imr no mega vil uebrig ;) Yam yam :)

Am FR Zobe hani denn no Aelplermagrone zum Znacht kocht ;) Hehe, es typischs Schwyzrgricht und mini Hostmum hets gliebt ;) Isch abr au mega eifach zum mache =)

Und letscht SA (4. November) het denn mini Hostsister s „Region Meet“ mit Cross Country gha. Sisch no cool gsi, allerdings hend sis leidr nit zum „State meet“ gschafft und damit isch d Cross country Saison abgschlosse gsi.

Jo, und letscht DI isch denn mi „3 months away from home anniversary“ gsi.
Irgendwie goht d Zyt so schnell verbi, und irgendwie chunnts mer trotzdem so vor als ob ich scho ewigs do leb… und einersits freui mi dass d Rueckreis noechher chunnt, abr anderersits machts mer Angst dass scho meh als ¼ verbi isch… ich ha do eifach bestimmte Luet kenneglernt wonich am liebschte wuerd mithei neh und woni mehr s gar nit cha vorstelle wies wird si wennich die denn nuem um mich ha… Abr ich ha jo imr no fascht 8 Monaet do =)

Und huet hanich kei Schuel well „Veterans Day“ isch. Dasch jetzt uebrigens erscht dr 3. freyi Tag woni do ha… nur so als Mitteillig fuer all die ferieverwoehnte Schwyzr Schieler ;)
Am 23. November isch denn allerdings Thanksgiving und denn hemer MI (odr DO?) bis FR frey… also quasi es verlaengerts Wucheend :) Und denn ungfaehr e Monat spoetr hemer denn endlich Wiehnachtsferie =) Was mich denn allerdings do dra erinneret dass denn scho Wiehnacht isch unds halbe Ustuschjohr scho verbi… well, anyways, ich gniess jetzt do min freye Tag, fang mi Physik und mi Am. Lit. Projekt fuer d Schuel a, fulenz chli und gniess s schoene Wetter…

Jo, das waer jetzt mol widr es langs update gsi ;)
I dr Gallery unter „Switzerland“ findet dir uebrigens no die lang ersehnte Bildr vo dr „Good bye party“!
Ich wuensch euch allne e schoens Wucheend und e gueti Zyt,
griess us em momentan sunnige Georgia,
Katja

PS an Lysi: Du hesch mer doch irgendwenn mol gseit ich sell luege eb die amerik. Kuchine wuerkli sone Zerhacker im Abfluss hend. Ha mini Gastmum mol gfrogt woni mi an die Frog erinneret ha: Jep, die moderne Kuchene hend dass normalerwis wuerkli! Mir hend do zwar nit e alti Kuchi, abr die hets nit. Mini Hostmum het abr no gseit si sig no verwunderet gsi dasses das Huus nit het. Abr normalerwis hend si das wuerkli *lol* ;)