mausi

[Ueberseht bitte nit dr Itrag eis undedra…]

Am DO, dr 30. November isch denn endli s erschte Meet gsi (das einte wo amene SA gsi waer isch abgseit worde…).
Und well ich halt nit gwuesst ha was mi erwartet bini au e x t r e m nervoes gsi *lol*
Alli andere im Team wo scho an Meets gsi sind hends abegspilt, und irgendwie het mi dass denn au chli beruhigt. Bi abr trotzdem so nervoes gsi dassi vorher chum ha ebis choenne esse… am 6i is offiziel losgange, abr mir hend miese am 5i scho doert si, zum ufwaerme und allem.
Womer denn am 5i endlich endlich ins Schwuembi ineglatscht sind waer i am liebschte widr umkehrt und hei. Es sind zwar nur 3 anderi Teams doert gsi, abr Greenbrier het meh als 70 (!) Schwuemmer gha, dr ganz Pool isch voll gsi, und d Tribuene sind 1 Stund bevors eigentli agfange het scho halb gfuellt gsi… okay, so vil zum Thema „nit so nervoes si“ *lol*.
Denn simer eus also go ufwaerme, und denn zrugg zu eusem Plaetzli zum alles mit em Coach nomol z bespreche.
Schwuemmmeets – het me mi vorgwarnt – choenne ebe recht hektisch werde. Jede isch quasi fuer sich selbr verantwortlich, und weme si Isatz verpasst isch me fuer de Event disqualifiziert, was sehr schlecht isch, wel me – au weme letscht isch – imr no Puenkt bechunnt, und durch ne Disqualifikation verliert meh denn ebe wichtigi Puenkt wome zum gwuenne brucht…

Jedi Person cha hoechstens 4 Events schwuemme, und dertdervo hoechstens 2 Einzelevents.
Relays (Staffetene) sind sone Art Grupperenne, d.h. ei Person startet, schwuemmt e gwuessi laengi, sobald si achunnt goht die noegscht etc.

D Renne sind in Events iteilt, d.h. z.B. Event 1 isch Relay Medley (Medley = ei Person schwuemmt Breast, ei Person schwuemmt Freestyle, eini Back und eini Butterfly), Event 2 isch denn z.B. Breast 100 m, Event 3 50 Freestyle etc.
Events sind denn in Heats iteilt; Heat 1 isch normalerwis die schlechteschti, und denn hets meischtens so um die 2-3 Heats, d.h. weme in ebis nit guet isch muess meh z.B. nit gege beschte schwuemme, so dass me denn au e Chance het weme nit soo guet isch…
Und Heats sind denn in Lanes iteilt. Lanes heisst soviel wie Bahn, und es het hoechstens 8 verschidene (meischtens sinds so um die 6 ume).

Jo, damit me denn halt ebe dr Ueberblick bhaltet schribt me sich dass mit wasserfeschtem Filzstift uf e Unterarm. Das gseht denn z.B. so us:

E8H1L5
E22H3L2

(Was denn wuerd heisse: Event 8, Heat 1, Lane 5 etc.).

Denn het eus dr Coach denn no igschaerft, ungfaehr 2 Events bevor mir drachoeme zu de Bahne ueberzgo und eus parat z mache…
(D Events, Heats, und Lanes mit de Naeme vo de Luet wo grad schwuemme und dr Zyt werde imr ufere Tafele azeigt).

D.h. i dem Fall (E8H1L5) wuerdme bi Event 6 zu dr andere Site vom Pool wo si starte, legt s Cap (Badechape) a, macht d goggles (Schwuemmbruelle) ready und wartet.
Ungfaehr 1-2 Heats bevor me denn dra isch goht me denn zu sinere Lane (i dem Fall waers Lane 5).
Und doert wartet me denn bis meh dra chunnt…

Am 1. Meet isch dr ganz Obe nerve-zerstoerend, well me halt eifach mol alles muess erlebt ha und so, abr bim 2. Meet is denn scho bessr und meh wird eigentlich erscht so chribelig weme sich denn parat macht…

Jo, und denn gits natuerli no Regle fuers schwuemme selbr… Friestart = Disqualifikation, bim Breast (Brustschwuemme) muess meh dr Rand mit bedne Haend alenge (bim Freestyle = Chraule lengt ei Hand odr e sogenannte Flip-turn), und weme denn z.B. vo dr Wand wegpusht chame nur 1 Stroke mache, muess denn dr Chopf ueber Wasser ha und cha erscht denn e witere Stroke mache…
Naja, toent kompliziert, abr sobald me sich mol dra gwoehnt het is eigentlich nuems o schlimm…
S einzige wo mir imr extrem Sorge macht isch d Angst d goggle bim Sprung ins Wassr z verliere, well me denn muess witrschwuemme (dr Coach wuerd eus umbringe wemer wuerde stoppe und se z rechtdrucke), und ich ha echt Problem ohni goggles z schwuemme welli d Auge untr Wasser nit cha ufha… naja, zum Glueck is bis jetzt bi mir nonie passiert und mini goggles hebe eigentli au recht guet =)).

Dr Coach het mi denn in 50 m Freestyle und 100 m Breast iteilt, und abgseh drvo dassi bi Breast in dr falsche Heat gsi bi (3 statt 2) is denn au recht guet glofe und am 20 vor 9i Zobe isch dr ganz Spuk denn au scho widr verbi gsi…
Leidr hemer denn verlore und sind letscht gsi, abr ich persoenlich bi eifach nur froh gsi dass s erschte Meet endlich dure gsi isch *lol* Irgendwie hets denn abr au no Spass gmacht, well mir eifach die Schuel sind wo am beschte afuehre =) (eigentlich meh schreye als cheere *lol*). Selbst wenn alli andere scho fertiggschwuemme sind (z.B. bim 500 m) und eusi Person imr no 100 m het schreye mr no so als giengs um alles =) (gohts eigentli au welme imr no mega vil Puenkt bechunnt denn…).

Am SA druf hend denn d Martine und ich e sogenannte Computer-games-day gha *lol*
Mir hend dr groesstteil vom Tag dermit verbrocht, Hamsterball, Wonderland und Luxor z spile *grins* Zobe hend mer denn dr Muettr no ebe e Stund lang gholfe Blaettr ums Huus zemme z naeh, abr suescht sind mr eigentli dr ganz Tag vorem Computer gsesse *oops* ;) Isch abr au mol cool gsi *lol* ;)

Am SO hemer denn s Huus putzt und parat gmacht fuer e Cross Country Party.
S Team vom Cross Country (d Season isch jo verbi) isch zu eus heicho, und mir hend e sogenannts Potluck gmacht. D.h. jede wo chunnt bringt ebis – e Salat, e Dessert odr Chips.
Mir hend denn Hamburger und Hot Dogs gha, und denn ebe Salaet und Kueche wod Gaest brocht hend. Die Erwachsene sind denn hauptsaechlich am schwaetze gsi und d Kids am Pool (Billard) spile ;) Isch abr no e tolle Tag gsi und meh als gnue z esse hemer au gha ;)

Am MO Zobe nachem Schwuemmtraining simer denn eigentli nur schnell hei, sind denn (d Shirley, d Martine & i) ind Stadt – Bibliothek go Biechr fuer e History Turn – in paper go sueche, und sind denn direkt zum Banquette in dr Schuel gange.
Das isch fuer d Sportler vom erschte Quartal vom Schueljohr gsi – d.h. alli Sportler wo in gnue practices gsi sind bechoeme e sogenannte Letter (e Zertifikat), und denn verleihe si no dr Coach Award und dr Most Valuable Sportler Award…
Irgendwenn um die halb 9i Zobe hemer denn au gschafft gha und hend endli hei choenne =)

Am DI Zobe isch denn s 2. Swim meet gsi =)
Mir hend jedi Wuche eins, und das isch scho vil bessr gsi.
Es het nur 2 anderi Team gha und Greenbrier isch nit doert gsi, d.h. es sind ungfaehr 60 Schwuemmer weniger gsi =)
Mir hends den tatsaechlich au uf e 2. Platz gschafft *hehe* =)
Noegscht Wuche isch denn es wichtigs Meet, d.h. drucket mer d Dume am DO! :)
(A dem DI isch denn uebrigens au mis „4 months away from home anniversary“ gsi =)).

Jo, das waers denn widr mol gsi =) Has tatsaechlich no gschafft das Wucheend chli aktualisiere, und uebr mis jetzige Wucheend schribi denn noegscht Wuche mol :)

Wuensch euch allne e schoene Advent,
hebets guet!
Katja :)

Und am MI, dr 22. November hend denn endlich endlich d Thanksgiving Holidays agfange =) Die hend eus zwar nit emol die ganz Wuche freygeh, sondern nur 3 Taeg, abr sisch uf jede Fall bessr als nuet gsi :) Well jo mini Familie urspruenglich vom Norde, genauergseit vo Pittsburgh, Pennsylvania isch, sind mr fuer d Feiertaeg mit em Auto doert ufe gfahre =)

Am MI Morge sind mer denn losgfahre, und well jo bekanntlich zwuesche Georgia und Pennsylvania e recht grossi Distanz isch sind mer denn au erscht Zobe acho… nach ungfaehr 11 Stund Fahrt…
Mir sind denn au nit direkt nach Pittsburgh, sondern zur Tante (Schweschtr vom Alan) uf ihri Farm gange. Die Gegend doert het mi denn au vil meh an d Schwyz erinneret, wells also so tolli Huegel gha het und so :) (Augusta isch extrem flach, und sisch schoen gsi widr mol es paar Bergli und Huegel z gseh =)).
Denn hemer denn au bi dr Wendy (Tante) uebernachtet, und am noegschte Morge gholfe s Thanksgiving Dinner z vorbereite.
Um die 2 am Nomittag hani denn au endli endli choenne mini zwoi aeltere Gastschweschtere kennelerne =) D Nicole isch 23, und d Simone 21 und si sind bedi sooo liebi wie dr ganzi Reschtr vor Familie au =) Mir sind denn zemme no zumene Teich, und denn spoetr widr hei und hend denn agfange mit em grosse Thanksgiving Esse.
Mir hend denn au es richtigs traditionells Esse gha mit eme ganze Truthahn, mashed potatoes (Haerdoepfelstock), und vilne andere guete Sache – dr ganzi Tisch isch volldeckt gsi, und wenni widr mol besorgt guesseret ha dassi vermuetli zvil wird esse, isch immr die sehr schlaui Antwort „that’s what Thanksgiving is about“ zrugg cho *lol* ;)
Z Nacht sind denn d Martine und ich no in Whirlpool vor Wendy hinterem Huus und hend d Sterne beobachtet (meh het d Milchstross mega guet choenne gseh!).
Spot z nacht sind d Martine und ich denn mit dr Nicole und ihrem Maa em Mo heigfahre zu ihrem Appartment in Pittsburgh (ungfaehr 1 ½ h drive gsi).
Und s coole an Pittsburgh isch, dass, weme doert hifahrt, zerscht durne Tunnel goht, und weme denn bim Tunnel usechunnt grad durch Downtown fahrt, d.h. mi seht schoen d Liechtr vor Stadt. Ha dass natuerli ufgnoh (gseht zwar uf em Video nit ganz eso cool us wies wuerkli gsi isch), und dass findet dir denn natuerli in dr Gallery… Pittsburgh isch e echt schoeni Stadt!

Am noegschte Tag sind denn d Martine und ich mit 2 vo ihrne Fruendine vo Pittsburgh go Schlittschueh laufe – mit dr Rachel und dr Gabi.
Nachdem sind mer denn ins Zentrum vo ihrem alte Quartier (Pittsburgh het mi vil meh an e Stadt erinneret als Augusta… Augusta isch irgendwie so… andersch… und ich ha au endli widr mol public transportation gseh *yeah*).
Im Zentrum hend mir eus denn mit 2 andere Fruende troffe, dr Lana und em B. (d Rachel het inzwuesche hei miese…).
Mir sind denn durch d Ichaufsstross glofe, sind imene chinesische Restaurant guet go esse, widr gschlaendert, sind gone Glace esse, hend eus denn vom B. verabschiedet und sind zu dr Lana ihrem Huus glofe (jep, glofe, dasch au widr mol e gueti Erfahrig gsi *lol* ;)).
Doert hemer eus denn igrichtet fuer e „Sleep – over – Party“ =)
Mir hend denn 2 Horrormovies agluegt – „The hills have eyes“ *bloody* und „Fear of the Dark“ *creepy* - und denn no verschideni Spili gspilt, und sind denn irgendwenn am Morge go schlofe :)

Am SA sind denn d Martine, d Shirley, d Nicole, d Simone & ich zu de Saul’s alte Nochbere, wo mega liebi sind  Mir sind denn doert gsi bis ebe am 4i am Nomi, und sind denn hei zu dr Nicole.
Ich ha denn doert mis Physikprojekt wo due Monday gsi isch witrgmacht und ha agfange s Plakat z mache. Zobe isch denn die ganzi Familie inkl. Boyfriend & Maa go Esse (Chicken wings *yam*), und denn sind mer – leidr ohni Mo – zumene Ussichtspunkt gange, wo me schoen uf Dowtown Pittsburgh gseh het =) Vo doert hani es paar tolli Bildli und Videos, und unter anderem au 1,2 Familiebilder =)
I really love that city  It’s so much cooler than Augusta… ;)
Jo, leidr hemer denn au irgendwenn widr zrugg miese, und fuer mich hets denn gheisse Endspurt fuers Projekt… naja, de Endspurt isch denn bis am Viertel vor 2 am Morge gsi, und am halb 8i hani denn scho widr miese ufstoh, abr irgendwie hanis denn au no gschafft *lol* ;)
Jo, denn het sich die ganz Family widr bir Nicole troffe, mir hend es typisch amerik. Zmorge gha (Doughnuts *lol*), und sind denn ufbroche fuer die langi Fahrt nach Augusta, GA…

Mir hend denn churz no bi dr mega liebe Grossmuettr verbigluegt, und sind denn gfahre bis irgendwie fascht am 11i zNacht well mr dummerwis irgendmoime in North Carolina in Stau cho si…
Uf jede Fall hanis au irgendwie no gschafft 12 Stund im Auto durezhalte… ;)

Und am MO hets denn leidr leidr au scho widr gheisse: D Schuel rueft…
Sisch abr es echt schoens Thanksgiving gsi und ich ha sooo vili liebi Luet kenneglernt =)
Isch echt sones schoens Familiefescht wie Wiehnacht, und Pittsburgh rockt!!!

Jo, das waer denn mis Thanksgiving gsi… ich weiss, ich bi imr no 2 Wuche hintedri – obwohli mi fuehl als wuerdi die ganz Zyt Blogitraeg schribe *lol* ;)
Uf jede Fall versuech i morn odr so no e 2. Itrag z schribe, abr jetzt is inzwuesche au scho halb 1 am Morge und ich moecht ins Bett =)

Liebi Griess an alli,
hend e schoeni Wiehnachtzyt,
Katja =)

Die letschte zwoi Wuche isch extrem vil los gsi, und einersits hanis total gnosse mol widr so vil neus z erlebe, abr anderersits is mr nacheme Zytli denn fascht e chli z stressig worde… abr zerscht mol vo vorne :)

Mi letscht Itrag isch jo ungfaehr 3 Wuche her, und denn hani jo grad verlaengerts Wucheend gha =)
Am FR Zobe sind mer denn mit dr Martine go ihri Driver’s permit (nit z verwechsle mit dr license!) go hole – d.h., sie het miese e churze Tescht am Computer mache, Foeteli mache und scho fertig!

Am SA Zobe sind denn dr Alan, d Shirley und ich anes Konzert vom Soccer coach sinere Frau, dr Tara gange (ich ha jo mit ihm zemme am MI Zobe amigs Fuessball gspilt). Zerscht isch e gueti Fruendin vor Tara, d Kitty uftrete und het es paar cooli Songs gsunge und uf dr Gitarre sich selbr begleitet. Und denn isch d Tara uftrete, z.T. mit dr Unterstuetzig vo ihrem Maa und ere andere Fruendin. Isch no recht toll gsi und si hend au wuerkli choenne singe :) Bildr sind wie immer in dr Gallery...

Am SO bini denn mit em Alan und dr Martine go Minigolf spile =) D Parks do sind vil fantasievoller gstaltet, mit so Tierfigure und so :)D Bahne an sich sind abr ungfaehr im gliche Stil. Es isch meeega fun gsi und ich ha sogar bim 2. Durchgang (s het 2 verschiedeni Bahne gha) gwunne *hehe* Gaell Papi, ich ha denn sogar dr Alan gschlagge :)
Und was denn au no cool gsi isch: Mitti November hemer choenne im T-shirt dusse sitze und Glace esse *hehe* Tja… s Wettr do isch halt doch irgendwie cool ;)

Am MI hani denn dr groesst Teil vom Morge in dr German Class verbrocht :)D Michelle us minere Guitar-class het nemli sit dem Johr Duetsch als Fremdsproch, und si het denn dr Lehrerin (wo uebrigens e amerik. Akkzent het ;)) verzehlt dass es a dr Schuel e exchange student het wo Duetsch redet, und denn het si mir mol ihre vorgstellt, und d Miss Brady het mi denn gfrogt eb ich mol as Gast in ihri Studene choennt cho und ueber d Schwyz verzehle und Froge beantworte.
Ich ha denn die erschte 4 Stunde doert verbrocht, und waehrend German 1 quasi nur „Hallo“ und „Wie goht’s?“ und „Wie heissisch?“ hei choenne froge, hani mit de German 4 Schieler die ganz Stund choenne uf Duetsch rede =) Das chunnt de meischte vo euch jetzt vermuetli verstaendlich vor, abr glaubet mer, Amerikaner choenne grundsaetzlich kei Fremdsproch richtig spreche ;)
Also de Morge isch echt no gmietlich gsi und ha fun gha, z.T. sind denn halt chli typischi amerik. – Boy – frogene cho wie „Am I sexy?“ etc., abr grundsaetzlich hend si echt gueti Froge gstellt gha =)

Und at lunch hani denn au endlich mi erscht richtig Pinlich Moment i dem Johr gha *lol*
Und zwar bini zwuesche denn Baenk dureglatscht, mi Fuess het sich inere Schuelsacklasche verhaederet und ich bi volle Pulle hiknallt *lol* Und 1/3 vo dr Schuel isch i dem Lunch *gg*
Naja, s hend nit grad alli higluegt, abr i ha denn doch d Ufmerksamkeit vones paar Schieler gha ;) Und alli denn so: „Hey, are you okay???“ Und ich ha nur schnell schnell Antwort gaeh und gluegt dassi schnell a mi Platz bi cho *lol* Mi Knue isch denn nachere Wuche imr no viollet – blau gsi und macht imr no e chli weh…

Am DO Zobe bini denn ellei anes Guitar Concert i dr Schuel gange. Es isch vo dr Advanced Guitar Class (ich bi jo in Beginner) gsi, und es het zwar leidr nit bsunders vili Zueschaur gha, abr i ha denn zum Glueck doch no es paar Schuelkollege vomer gfunde =) Isch zwar nit s beschte Konzert gsi, abr sisch fun gsi und si hend denn au no meh als gnue food gha ;)

Am FR bini denn nach dr Schuel bis ebe 4.15 p.m. laenger blibe und ha es paar Lehrer as Versuechskaninche fuer mis Physik-projekt (High Frequency: „Is there a difference between younger and older people’s hearing regarding frequency?“) missbrucht *lol* (Kei Angst, si sind no ganz ;)).
Und denn isch au endlich widr Wucheend gsi =)

Am SA hemer denn doch kei Schwim – meet gha *phu, nomol Glueck gha* ;), drfuer hani denn Ufzgi gmacht, Woesch gwaesche, mini chores gmacht und halt eifach e sone typisch lahme Tag gha, was abr au mol widr guet gsi isch nach so vil Programm…

Am SO sind denn d Shirley, d Martin und i am Morge widr in d soup kitchen vo ungfaehr 8.30 a.m. bis 12.30 p.m., und denn direkt vo doert go Paintball spile. Jep, dir hend richtig glese, dr Martine ihri Youth group vo dr Synagoge isch go Paintball spile – und ich dummerwis au…
Okay, ich denk ich moecht jetzt nit gross druebr verzehle, abr jae, d Paintball isch dass mit dene harte Baell, und jae, Paintbaell mache weh, und jae, weme dr erschti Paintball a Kopf bechunnt und vo dem headache bechunnt denn machts kei Spass meh… uf jede Fall hend zimli alli Fun gha ussr mir, abr immerhin hani es interessants Gsproech uebr Florida etc. miteme awesende Vater gha.

Nach em spile wos denn scho dunkel gsi isch, hend d Martine und ich mit dr Heather choenne heifahre. Si isch i eusem Alter und mer kenne se vo dr soup kitchen.
S Paintball spile isch ufere Militaerbasis gsi, und well ihre Vater doert uf dr Fuerwach schafft het si halt no schnell zuenehm welle =) Glueck fuer mi: D Firestation isch no mega gross gsi, und dr Vatr het eus i dr ganze Station umegfiehrt, eus alli Ruem zeigt und eus ueber d Arbet verzehlt :)Also so wies usgseht lohts sichs doert echt no lebe: Grossi schoeni Kuchi, living room mit vilne bequeme Sessel und eme schoene grosse Tisch, und eme Beamer mit riese Leinwand, denn versch. Bueros, Computerruem etc., in dr Mitti denn d Halle mit 4 (!) Firetrucks (Engine, Ladder etc.), chline Fahrzueg und Autos, und denn uf dr anderi Site d Schlofruem (er het eus denn no sis chline Zimmr zeigt woner denn halt mitere Person vo dr andere Schicht teilt). Abgseh vo de doch sehr chline Zimmr (Bett, Chaschte, Brueneli, and that’s it), is e mega schoeni grossi Fuerwach. Denn het er eus no s gym (Fitnessrum) zeigt, und eus ueber so Wettbewerb und Sache verzehlt.
D Martine het denn no die ganz Usruestig agleigt (extrem vili Chleidr, Atemschutzgraet, und sogar d Axt het si in d Hand gno ;)), und er seit no so: „If the alarm goes off, I need you to take this off in 15 seconds!“, und mir luege eus nur so a, oh-oh ;) Dr Alarm isch denn zum Glueck nit los gange (die hend ebe nur 45 sek. Zyt nachdem dr Alarm abgoht bis d Trucks abfahre), und wenn mr no meh Zyt gha hette hetis au no choenne alege… abr d Heather het gseit mir choenne doert widr go, und denn nimi ganz bestimmt au mini Kamera mit, welli die wegem Paintballspile nemli nit derbi gha ha… :)
Uf jede Fall hend mir denn eus verabschiedet, und well ich bilaeufig mol verzehlt ha dass mi Vatr mol bi dr freiwillige Fuerwehr Kommandant gsi isch, het er mi denn ploetzlich so gfrogt: „Would you like a patch that you could send home to your Dad?“, und ich bi natuerli fascht in d Luft gsprunge vor Freud =) Denn het er dr Martine und mir bedne e Patch (es Abzeiche) vor Basis gaeh :)Soooo cool! Ich choennt eigentli mol es Foeteli dervo mache und online stelle =) Es isch gelb, und es stoht dr Name vo dr Basis druf („Fort Gordon“), und denn no ebis i dr Art vo „Mir schuetze die wo euses Land schuetze“ (wie gseit, sisch ufere risige Militaerbasis)… Dasch echt sooo cool gsi und ich has gar nuem bereut dassi mitgange bi go Paintball spile ;)

Ich bi no lang noni fertig mit verzehle vo de letschte Wuche, abr wells no es Zytli wird go bisi die letschte Wuchene verzehlt ha, und well ich denk dir moechtet vilicht mol gern widr echli ebis lese, dueni dass jetzt mol poste und post denn dr noegschti Teil spoetr :)
Bis denn, Katja :)