mausi

Am Fritig hani min letschte Schueltag gha... und das ganze isch zimli... "weird" gsi.
Im Moment isch für mi eifach no alles sehr surreal... meh isch sich gar nit bewusst, dass mes letscht Mol für es Johr durch die Gäng lauft, dass me e paar us dr Klass ab jetzt für 1 Johr nüm wird gseh etc.
(Well ich abr am 11. Aug. no e Abschiedsparty wird mache, sehni die meischte nomol...).
Und o dehei bin ich mir überhaupt nit bewusst, dass es nume no ebe 5 Wuche goht.
Ich cha mi no genau erinnere, wieni im Nov. i dr Stube gsesse bi, und mich würkli nomol hintrfrogt ha, möcht ich das würklich mache.

Geschtr hani denn au endlich mol chli meh Infos becho.
Ich bi jetzt eigentli jede Tag mehreri Mol agfrogt worde, eb ich denn endlich weiss wonich hichum, und eb ich denn scho e Familie ha, und wenn ich denn ha miese verneine, het mich das selbr denn au imr widr chli verunsicheret. Sit geschtr weiss ich jetzt, in wele District dass ich wird cho. D.h., das sind ebe so 10-12 Staate inere bestimmte Region vor USA. Im Moment möcht ich do abr no nüt verrote, ich gib den Bscheid sobald ich genau weiss, wohi dass ich chum :)
E Familie hani leidr imr noni, abr ich hoff dass ich demnächst eini bechum.
Und am MO in 2 Wuche muess ich denn au no uf d Botschaft ums Visum z becho.

Jo, das wär eigentlich widr s neuschte gsi, meh weissi selbr leidr au nit würklich.
Sobald ich mini Familie ha wird ich das do natürli erwähne.
Ussrdem hanimer grad e neui Emailadresse zuegleit, wonich nögscht Johr wird benutze:
katie.usa@hotmail.com!

Letscht Wucheend is 2. Weekend vo YFU gsi, woni vorher scho paar mol erwähnt ha.
Und zwar sind vo dene 20 Studies vor Region Basel genau 7 Stück cho *lol*, abr eigentli is so umso bessr gsi und me het die einzelne würkli guet chönne kennelerne :)
Das Weekend isch sau hammr gsi! Mir persönlich hets au vil besser gfallt als das z Lenk, wells eifach vil persönlicher, und viel gmietlicher gsi isch.
Chum si mer acho hets es gmietlichs Apero mit Getränke und Salzstängeli gäh, und s Wettr het supr guet derzue passt: D Sunne het gschine wie si nur het chönne (bewisst mi mit Sunnebrand übersehte Rücke hüt no ;)).
Spötr hets denn no in 3-4er Gruppe e witzige Postelauf gäh, wo die rund 7 Leiter für uns gmacht hend =)
Zum Znacht hets Tortillas gäh mit eifach allem erdenkliche: Fleisch, Peperoni, Tomate, Mais, Bohnemasse, irgendso ebis griens wo ähnlich heisst wie Avocado, und natürli au recht scharfi Sossene derzue, wies sich halt ghört ;) Zobe het mes denn no mit Fuessball spile und quatsche luschtig zemme gha, und so um die 10i hemer denn no e Film, passend zum Thema Ustuschjohr, gluegt: "L'auberge d'espagnole" (oder so, isch Französisch, und vo Franz. hani jo bekanntrwis kei Ahnig ;)).
Während em Film isch denn no die Unmengi vo Kueche, Küechli, Gummibärli, Cookies und was-weiss-ich-no-alles-für-Dessert gesse worde (s wunderet mi dass mer nit alli mit 5 kg meh hei sind, so viel hend mir die 2 Täg gässä *lol*). Wo denn nach de 12ne alli in d Bettr sind het me natürli no miese quatsche bis am 2i am morge, und zum Glück hämer denn am nögschte Morge chönne bis am 10i schlofe & denn gmietlich im Sunneschiin duse brunche.
Nach em Zmorge het me denn no Zit gha zum sünnele, quatsche und gaaanz vilne Föteli, Fotialbene & Yearbooks aluege =) Ich empfehl würkli allne wo'd Möglichkeit derzue hend, an das Wucheend z go, es isch eifach sooo genial!!! Nach dem chli stressige Weekend in Lenk isch das richtig gmietlich gsi, meh het guet chönne übr d Erfahrige vo de ehemalige Ustuschschieler rede und het eifach zemme Spass gha :)
Ich würd sofort widr go!

Wow! I bi grad vor ebe 3 Stund heicho und ich ha das Wucheend soo vil erlebt und erfahre dassi irgendwie s Gfühl ha mi Kopf sig chli überlastet.
I ha das WE s OW (Orientierigswucheend) in Lenk im KUSPO gha, mit ca. 240(!!!) jetzige und zuekünftige Ustuschschieler (+ ebe 60 Leiter) und sisch eifach Hammr gsi :)
Enorm astrengend well dr Zitplan so vollgstopft gsi isch und meh eifach so vil neus und alts ghört het und sich vili Gedanke het miesse mache bzw. gmachthet, abr sisch eifach e supr Stimmig gsi, meh cha sich jetzt chli meh uf >nögscht Johr< (was scho in 3 Monät wird afo ;)) istelle, und es isch eifach u huere cool gsi so vili anderi Exchange Students z kennelerne :)
Ha au es paar "alti" Gsichtr atroffe, abr au sehr vili neui kenneglernt, und das obwohl das s eigentliche WE nur 24 Stund gange isch (+ denn eifach no insgesamt ca. 8 h Zugfahrt ;)).
S einzige würkli grusige das WE isch sone "Cracker" gsi womer hei imene "Spili" miese esse (stellet euch vor, dir miesset folgendes abeschlucke: zunderscht ca. 1/4 Cracker, druff Ketchup, e Mögli Schoggi, Senf, e Stück Ananas und zoberscht e Kapere... jep, so guet wies tönt hets au gschmeckt ;)).
Abr sisch würkli e sehr es tolls Wucheend gsi und het mega Spass gmacht =)
Bi zwar jetzt recht mied nach nur ebe 4-5 h Schlof abr s het sich glohnt, au wenn d Zugfahrt recht astrengend gsi isch (SA morge 4 h hi und denn SO Mittag 4 h zrug).

Woni denn hüt heicho bi isch o e YFU Brief parat glege wegem Visum woni alles muess mache und s het mi schier wegjagt ;) Abr daderzue spötr mol chli meh, bi grad z mied das genauer uszfiehre ;) Abr es isch echt mega strange was me dört alles muess mache und erfülle *lol*.

So, das wärs mol widr gsi, wie gseit, spötr folgt meh ;)

Hüt hani endlich widr mol en Brief vo YFU becho :)
Und zwar sind Datene für die nögschte Verastaltige dinngstande.
Bevor ich im August wird fliege gits no am 11. Mai e Infoobe für d Eltere & die zuekünftige Ustuschschieler, denn Endi Mai es obligatorischs Weekend, denn im Juni e 2. Weekend wo freiwillig isch, eifach für d Ustuschschieler vo Basel & Region. Und denn gits glaubs Endi Juni no e "Goodbye Party" für die jetzige Ustuschschieler do in dr Schwyz und die wo s nöchschte Johr im Usland werde verbringe.
Also ich freu mich scho sehr uf die Events und wird denn do au imr schribe wies denn so gsi isch ;)
So, das wäre denn die neuschte News gsi, ich meld mi sobald widr neus git =)

So langsam realisier ich glaub dass ich es Johr wird weg si.
Sau komisch, abr in letschtr Zit falle mir imr so Sache uf, woni möcht go, und mir denn ifallt dass das gar nit goht well ich jo denn ab em August gar nüm do bi.
Z.B. im Musik, het dr Lehrer Werbig für's Stomp Musical geh... ich ha unbedingt nomol welle go (bi scho mol gsi und has sau guet gfunde), bis mir denn ufgfalle isch, dass das erscht im September isch.
Und hüt het e Kollegin dr 17. Geburi gha. Ich ha se gfrogt eb si e Party macht, und si het gseit "nögscht Johr bim 18. denn". Und denn isch mir ufgfalle dass i fascht alli 18. Geburi vo all mine Kollege und Kollegine verpass... und das nervt mi chli, wells denn imr so luschtigi Parties git... und well halt dr 18. Geburi ebis bsundrigs isch...
Abr wenigstens chan ich denn min 18. widr dehei fiere, mit all mine Friends vo do ;)
Naja... ich freu mich zwar sehr uf das Johr, abr langsam wird mir scho chli mulmig... aber ich würd trotzdem am liebschte grad jetzt scho go *g*
Meh seht sich =)

Obwohl i nit weiss eb das jemal eber wird läsä schrib ich mol widr en Itrag ;)
Im Moment würdi am liebschte endlich go, Koffer packe und ins Flugzüg stiege.
Die paar Mönät do schisse mi regelrecht a... nit falsch verstoh, ich wird alli mini Fründe, Bekannte & mi Family vermisse, abr im Moment chunnts mir nur so vor als würdi die 3 Mönet i dr Schuel nur no absitze bisi denn endlich cha go...
Note gheie immr wie meh welli mi nit cha konzentriere und kei Motivation meh ha zum lerne... ich hang die meischti Zit im Internet ume und lis was anderi Ustuschschieler so mache & erlebe... und ich wot eifach au =)
Irgendwie bini guet druf welli mi ufs nögschte Johr freu... ha jo im Skilager chli es down gha und nit so recht gwüsst was mache, und jetzt bini froh bini so ufgregt uf nögscht Johr, aber anderersits bini schlecht drufe welli kei Bock meh ha, mich jede Tag in die Schuel do z schleppe... und das obwohl mir grad 2 Wuche Ferie gha hend und erscht morn widr in d Schuel miese...
Und ich würd so gern so vil mache mit Fründine und Kollege, ha mit dere Person so e halbi Abmachig für e DVD-obe gmacht, mitere andere Fründin möchti go shoppe, möcht eifach mol widr s Lebe gniesse und Fun ha... und irgendwie hangt grad sone Wulche drüber well mir die Schuel irgendwie nit gnue Zit loht... d.h. Zit an sich scho, aber wenn ich nur am MO Nomi frei ha (und denn meischtens eifach dehei sitz und für d Wuche lern und am PC umehang) und denn di ganz Wuche immer erscht Zobe heichum isch das nit grad so toll. Und am Wucheend chani imr höchtens 1 Tag ebis tolls mache well irgendwie no Zit muess iplant werde zum lerne... ich ha grad 2 Wuche Entspannig hintr mir und s gfühl sobald ich morn widr in d Schuel gang lebi widr nume für die... fühl mi grad zimli igeengt, und dassi grad Deprimusik los hilft grad nit so vil ;)
Also kurz gseit, irgendwie hanis Gfühl ich hang grad chli in dr Luft... und weiss nit so recht was mit mine Gfühl azfo... me chönnt meine ich ha es Burn-out obwohl ich grad sehr schöni Ferie hintr mir han...

Naja, ich denke sobald ich morn ufstand und widr Kollege um mich ha bini widr bessr druf :) Bi normalerwis nemli die meischte Zit sehr guet druf und bi grad chli selbr vo mir verwirrt... wot nit wüsse wies denn isch a mim Abreisetag *hilfe*.
Und sobald denn de mega Franz-Grammatiktest am MI dure isch gohts mir denk au widr besser, well denn hani nur no Englischwörtertest und Spanischwörtertest und Englisch & Spanisch lerni gern, vo dem her =)
*bi mi grad selbr widr chli am ufbaue ;)*

Vilicht chumi au nume langsam isones Stressgfühl (obwohli jo no ebe 4-5 Monät do bi) dassi no möglichst vil mit möglichst vilne Lüt möcht mache (snowboarde mit Fründine, go shoppe mit mim Schnuggi, DVD - obe mit dr Elza etc.) und im Moment halt grad nit so Zit ha und denn schiss ha dassi dass alles nüm so cha mache und mich denn nerv dassi nume no so wenig mit dene Personene gmacht han...

Also, bevor ich jetzt widrgrüble und am Schluss no bimene Psychiater uf dr Couch land höri jetzt besser uf schribe ;) Machet euch keini Sorge um mi, dass chunnt denn scho widr *g*

GLG euches Katilein

Es git super Neuigkeite :)
Ha am FR en Brief vo YFU becho, wo mir mitteilt worde isch, dass ich dr SLEP - Test bestande han =) *freu*
Vonere Skala vo 20-80 hani 60 Pünkt erreicht, min. 40 verlange d Highschools.

Soo, jetzt chani endlich ganz entspannt em YFU - Weekend entgegeluege, woni mi jetzt scho mega druf freu :)
LG, Katja

I ha jo hüt dr SLEP - Test gha... und es isch definitiv es guets Erlebnis gsi... bi zwar immr no chli unsichr abr ich hoff es chunnt guet use. In de nögschte Tag wird ich wohl s Ergebnis erfahre. S wird emel jetzt alles nach Bern ind Office gschickt und denn gseht meh witr.

S ganze het am 2i agfange und isch grad ebe bis am 10 vor 4i gange.
Dr Tescht isch us 2 Teil bestande, en hören/verstehen Teil (~45 min) und en schriftliche Teil (45 min).
Bim mündliche isch es eso gsi dass me es Tonband ghört het und immr 4 Möglichkeite und s richtige het miese akrüzle (also multiple choice). Es het so kindergartemässig agfange: Me seht es Bild, z.B. mitere Frau wo list. Denn ghört me: a) The woman is looking at a newspaper. b) The woman is eating a sandwich etc. Also würkli eifach. Mit dr Zit is abr immr schwerer worde und denn isches z.B. mit dr Zit eso gsi dass me e Dialog ghört het und 4 Antwortemöglichkeite, abr no kei Frog gwüsst het und erscht nach dem Dialog d Frog gstellt worde isch... also no recht aspruchsvoll...

Dr schriftlich Teil isch denn au widr 45 min gange.
S het au widr so mega eifach agfange. Me het z.B. es Bildli gseh mit 4 Persone: d Muetter wo imene Stuhl sitzt und list, d Tochtr wo im Pool schwümt, dr Vatr wo rassemeiht und dr Sohn wo im Ligestuehl ligt und sich icremt.
Denn isch e Ussag gstande, z.B. "I love reading when the sun is shining" und denn het me miese die ussag einere vo dene Persone zueordne. Odr meh het e Ussag gha und 4 Bildli und s richtige Bild wähle (es sind immr 4 zur Uswahl gsi). Mit dr Zit is denn abr recht hart worde und gege Schluss sinds Lücketext über globali Erwärmig, Knocheschwund und anderi Themen gsi wo me denn eifach sehr vil Wörter nüm kennt het und eifach het miese versueche dr Inhalt z verstoh. Abr insgesamt isch s echt okay gsi.
Mega interessant wenns am Afang eifach isch und denn mit dr Zit merkt me plötzlich wies aspruchsvollr wird und meh sich meh muess konzentriere...

So, das wärs widr mol gsi... ha widr mol en halbe Roman gschribe ;)
Ich meld mi denn sobald i meh zum Testergebnis weiss...
Katie

Also, jetzt is so wit, morn - SA dr 11.02.06 - hani dr SLEP (Secondary Language English Proficiency) - Test.
Es isch alles multiple choice und eifach 45 min lesen/verstehen und 45 min hören/verstehen, also ich denk es wird nit sooo schwer. Vonere Skala vo 20 - 80 Punkt muess meh min. 40 erreiche (aber angeblich chame au is Utsuschjohr go weme weniger het... und AFS het z.B. de Test au nit. Ich glaub sisch eifach zum gseh wo me stoht). Also i nimm mol ah (odr i hoffs zumindest) dass i min. 40 wird erreiche.
Alllssooo, wenn sich eber sozial möcht betätige sell er mir doch bitte morn (am beschte dr ganz Tag) d Dume drucke ;) Merci!
Katja

Geschtr isch jo s 1. YFU - Träffä (zumindest für mi s erschte) gsi und vo 150 igladenige sis denn au nume ebe 10 gsi... und ich die dervo die einzigi Schwizerin (usserem Leiter natürli). Dr Obe isch abr trotzdem (odr vilicht grad wege dem) eifach HAMMER gsi! Mir hei eus am Bahnhof troffe und uns alli vo afang a guet verstande. Die andere hend sich jo scho vo de letzte Treffe kennt und obwohl i neu gsi bi bini sofort guet ufgno worde :) Mir sind denn zur Ishalle irgendwo in Basl in dr Nöchi vom Bahnhof go Schlittschueh laufe (mir sind sogar bi dere Stross dure woni im Herbst s Interview gha ha). Am Afang no chli wackelig uf em Iis hai mir eus denn abr guet gschlage und si mit dr Zit sogar richtig guet unterwegs gsi ;) In de knapp 2 1/2 Stund het me sich denn sehr guet chönne unterhalte und het das natürlich au flissig gmacht ;) Vorallem toll isch gsi dass dr Leitr Raphael vor 5 Joor es Ustuschjohr in dr USA gmacht het und ich ihn so natürli vil ha chönne froge und vil neues erfahre ha. Es isch uf jede Fall SEHR interessant gsi und ich bi bestimmt nögscht Mol au widr derbi. Alnne Teilnehmer vile Dank für die netti Begriessig, ich hoff me seht sich nögscht mol widr :) Katja